YUMI YET YUMI PNG!!

Dia Patriots!

Mi ting olsem bai mi raitim dis'la toksave lo tokpisin. Mi save olsem yupla olgeta save lo tokspisin so em bai orait…

Lo makim maus blo President Henry Osembo na ol narap'la lidaman na meri blo Patriots PNG mi laik tok bikpela tenkyu lo yupla ol memba na u husait sa’ salim tok hamamas na sapot lo wok blo PPNG. Dis'la grup em no wanpla fb grup nating. Em trutru Asosiasen o grup i wok long mekim trutru wok i go het long kamapim senis lo PNG (ino lo intanet tasol). As tingting blo grup em long helpim yumi yet ol pipol blo PNG lo laikim kantri blo yumi trutru long bel na tingting na ino lo maus o bilas tasol. Na long helpim yumi long sensim pasin. Sapos yumi senisim pasin bai kantri blo yumi senis trutru.

Dis'la no wanpla isi wok. Bel na tingting blo man em yu yet gat pawa long senisim (yu yet wantaim God). Wok blo PPNG em long soim (1) sampla asua blo yumi oslem pipol blo PNG, (2) sampla as blo senis na (3) sampl rot o wei we yumi ken senis. Em ken soim ol disla samting tasol sait blo senis trutru em stap lo yumi wanwan. Sapos yu no lukim nid lo senis bai yu les lo wokim wanpla senis. Olsem na mipla laik kamapim sampla wei lo soim yumi olgeta PNG manmeri long ol dis'la nid blo senis.

Planti grup ol wokim planti gutpla wok long PNG lo senisim kantri blo yumi. Tasol lo sait blo strongim toktok blo senisim pasin em nogat planti grup i stap. Patriots PNG em kamap long dispela wanpela as tasol. Yumi no politikol ektivist, or charity grup. As tingting blo PPNG em lo bungim ol yumi pipol blo PNG long lukluk lo senisim pasin.

Lo pinis mi tok tenkyu gen lo sapot blo yupla ol fb memba blo PPNG. Sapot blo yupla i save helpim mipla bikpla stret lo go mo long disla wokabaut.

Tenk yu na God i ken Blesim Papua Niugini!

Laikim

Ganjiki